Metropol

[grepi]

Etiketa e Plazhit/ Në plazh, mbi të gjitha, të rezervuar: ndërrimi në kabinë, toples vetëm gjatë qëndrimit në shezlong dhe celularët, silenciozë. Të pakëndshme edhe bizhuteritë e tatuazhet e ekzagjeruar. Rregullat e plazhit për verë-2005 vijnë nga ekspertët e “Business etiquette” dhe “Public relations” në New York University

Diskretë në plazh


B. B

Ndërrimi në kabinë. Ekzpozimi me toples është i pranueshëm vetëm gjatë seancës së nxirjes ose qëndrimit në shezlong. Nuk duhet tepruar me bizhutë, trukun e rëndë dhe tatuazhet, ndërsa celularin duhet ta mbani gjithnjë pa zile. Bisedat, të gjitha me zë të ulët. Të gjitha këto, sepse sjellja korrekte nuk duhet harruar as në plazh, ku rregulli numër një për këtë verë sipas eskpertëve të etiketës në Universitetin e Nju Jorkut është të qenit diskret. Të bësh figurë të keqe dhe gafa, konsiderohet si sjellje vulgare. Ja një “vademecum” i turistit “të sjellshëm”, një etiketë e vërtetë, e vlefshme për të gjitha plazhet.
Jo bizhuteri dhe kanotjere
Etiketa nis nga veshja: plazhi është, sipas ekspertëve të etiketës, i vetmi vend ku mund të veshësh këmishë të bardhë që në mëngjes, me kusht që të mos ketë njolla djerse. Të pranuara dhe madje të këshilluara, veshjet në lino dhe pambuk. Për gratë, rregulla rigoroze, sidomos për trukun dhe aksesorët: janë të papërshtatshëm bizhuteritë, truku i rënduar, parfumet, rruazat në qafë, çorapet në sandale dhe kanotjeret nën bluzë.
Ndërrimi në kabinë
Krejt ndryshe nga ç’bëjnë vipat e fotografuar nga paparacët, në modë është ndërrimi në kabinë dhe jo në sy të të gjithëve. Tanimë edhe plazhet më të rëndomta kanë kabina zhveshjeje ose tualete për t’u ndërruar, në mënyrë që të mos ua ekspozosh lakuriqësinë të tjerëve. Dalja toples lejohet vetëm kur rrezitesh në diell, por jo gjatë shëtitjeve në breg apo vërdallosjeve në plazh. Në një rast të tillë, pjesa e sipërme e rrobave të banjove duhet të rikthehet në vendin e vet. Duhet të mbulohesh edhe kur shkon në bar ose në restorant ku t-shirt-et dhe shalli janë të detyrueshwm, ndërkohë që janë të lejuara këmbët e zbathura. Nevojitet moderim qoftë edhe kur bën dush, i domosdoshëm për t’u shpërlarë shpejt e shpejt ose për t’u freskuar, por jo për t’u larë. Tek e fundit, nuk është e këndshme të ekspozohesh në performanca të tilla, të rezervuara për intimitetin e vaskës tënde të banjos. Rregullat e edukatës së mirë janë të vlefshme edhe për mbajtjen e syzeve të diellit: mund t’i mbash gjatë një bisede, por në momentin e prezantimit duhen hequr patjetër.
Celularët e pazëshëm
Edukata e mirë reflektohet edhe në mënyrën se si përdor celularin. Edhe në këtë rast, rezervimi është rregulli i artë: volumi i ziles duhet ulur në maksimum, ashtu si edhe zëri gjatë bisedës telefonike që për asnjë arsye nuk duhet të shqetësojë pushimin e një personi tjetër në çadrën fqinje. Dhe në fund, ata që ushqehen nën çadër, duhet të kenë kujdes të mos e transformojnë plazhin në një guzhinë me shishe e pjata të shpërndara andej-këndej.
Tatuazhet-soft
Këshilla të rrepta edhe për të apasionuarit pas tatuazheve, sepse të jesh “trendy” është e rëndësishme, por gjithnjë me elegancë dhe rezervim. Dimensionet e dizenjos nuk duhet të jenë të ekzagjeruara, ashtu si edhe pjesa e trupit ku ke vendosur të bësh tatuazhin: sipas ekspertëve është e preferueshme të mos bësh tatuazhe në vende tepër sensuale.
Mirësjellje edhe me shitësit
“Beach etiquette” kërkon kortezi edhe kur bisedon me shitësit ambulantë: duhet pritur me mirësjellje çdo përshëndetje e shitësit ambulant që propozon artikujt e tij, por duhet të thuash me vendosmëri “jo, faleminderit” nëse nuk je i interesuar. Është shenjë e mungesës së edukatës edhe kur insiston për çmimin me to. Nëse është e mundur, duhet të evitosh edhe thirrjen me zë të lartë për të tërhequr vëmendjen e tyre, si edhe të shohësh të gjitha produktet që ata shesin kur e di që nuk do të blesh asgjë.
Në varkë me sa më pak bagazhe
Etiketa duhet të ju shoqërojë, edhe kur ngjiteni në varkë. Gjatë udhëtimit duhet të merrni sa më pak veshje për t’u ndërruar dhe gjëra që mund ta detyrojnë ekuipazhin të merret me ekzigjencat tuaja, pa harruar që nuk duhet rënduar varka me bagazhe: është më e udhës të merrni gjërat më të domosdoshme në një çantë krahu.




23/07/2005

marr nga "Shekulli"

grepi, dora vet